ნატალია  ინგოროყვა, სოციალურ მეცნიერებათა დოქტორი

კვლევის მიზანი:  წინამდებარე ნაშრომის მიზანია 2018–2025 წლების პერიოდში საქართველოში მედიაწიგნიერების სასწავლო რესურსების განვითარების დინამიკის შესწავლა და ანალიზი. კვლევა ფოკუსირებულია ეროვნულ სასწავლო გეგმაში მედიაწიგნიერების სტატუსის ცვლილებაზე და მიმოიხილავს საქართველოს კომუნიკაციების ეროვნული კომისიის პლატფორმაზე (mediatsigniereba.ge) და პროფესიულ-პედაგოგიურ პორტალზე (mastsavlebeli.ge) განთავსებული რესურსების შინაარსობრივ და ფუნქციურ თავისებურებებს. 

მეთოდოლოგია: კვლევა ეფუძნება თვისებრივ სამაგიდე კვლევას (Qualitative Desk Research) კონტენტ-ანალიზისა და შედარებითი ანალიზის მეთოდების გამოყენებით. მონაცემების ვალიდურობა დაცულია ტრიანგულაციის მეთოდით.

მიგნებები: ანალიზმა აჩვენა, რომ მედიაწიგნიერება საქართველოში გამჭოლი კომპეტენციიდან პრიორიტეტულ, ფორმალიზებულ საგანმანათლებლო მიმართულებად ჩამოყალიბდა. რესურსების ევოლუციის თვალსაჩინო მაგალითია  მასწავლებლის წიგნი -„ციფრული ტრანსფორმაცია, თანამედროვე გაკვეთილები“(მასწავლებელთა პროფესიული განვითარების ეროვნული ცენტრი, 2025წელი),საქართველოს კომუნიკაციების ეროვნული კომისიის, გაეროს ბავშვთა ფონდისა  და განათლებისა და მეცნიერების სამინისტროს მიერ 2023 წელს გამოცემული წიგნი-„მედიაწიგნიერების გაკვეთილები“, ასევე,  eTwinning-ის პროექტები, რომლებიც თეორიულ ცოდნას პრაქტიკულ, კოლაბორაციულ შემოქმედებად გარდაქმნიან. გამოიკვეთა რესურსების რაოდენობრივი ზრდა (45%) და ფოკუსის გადატანა ხელოვნური ინტელექტის (AI) ეთიკაზე.

დასკვნა: კვლევა ადასტურებს, რომ მედიაწიგნიერების სწავლება საქართველოში გადავიდა სისტემურ ეტაპზე, რაც აისახა სპეციალური სახელმძღვანელოების შექმნასა და ესგ-ში მის ფორმალურ აღიარებაში. კვლავ გამოწვევად რჩება  საგნობრივი რესურსების მრავალფეროვნება.

საკვანძო სიტყვები:
მედიაწიგნიერების პოლიტიკა; სასწავლო რესურსები; ეროვნული სასწავლო გეგმა; პროფესიული პედაგოგიური პლატფორმები; AI-წიგნიერება

Abstract

Research Objective:

This paper aims to examine and analyze the dynamics of the development of media literacy educational resources in Georgia during the period from 2018 to 2025. The study focuses on changes in the status of media literacy within the National Curriculum and highlights the specific characteristics of materials published on the platforms of the Georgian National Communications Commission (https://mediatsigniereba.ge/) and the professional pedagogical platform Mastsavlebeli (https://mastsavlebeli.ge/).

Methodology:

 The research is based on qualitative desk research, employing content analysis and comparative analysis methods. Data validity is ensured through the triangulation method.

Findings:

 The analysis reveals that media literacy in Georgia has evolved from a cross-cutting competence into a priority, formally recognized educational domain. Notable examples of resource development include The Teacher’s Book 2025 and eTwinning projects, which transform theoretical knowledge into practical, collaborative, and creative activities. A quantitative increase in resources (45%) was identified, along with a noticeable shift in focus toward the ethics of artificial intelligence (AI).

Conclusion:

The study confirms that media literacy education in Georgia has entered a systemic stage, reflected in the development of dedicated textbooks and its formal recognition within the National Curriculum. However, the limited diversity of subject-specific resources remains a significant challenge.

Keywords:

 media literacy policy; educational resources; National Curriculum; professional pedagogical platforms; AI literacy.

საკითხის აქტუალობა

თანამედროვე ციფრულ ეპოქაში, სადაც ინფორმაციის ნაკადი გლობალური ქსელების მეშვეობით წამიერად ვრცელდება, მედიაწიგნიერება აღარ განიხილება როგორც მხოლოდ დამხმარე უნარი; მედიაწიგნიერება უკვე  ჩამოყალიბდა დემოკრატიული საზოგადოების მდგრადობისა და ინდივიდის უსაფრთხოების ფუნდამენტურ გარანტად. UNESCO-ს (2021) მედია და საინფორმაციო წიგნიერების (MIL) ჩარჩო დოკუმენტის თანახმად, კრიტიკული აზროვნება და მედიასთან ეთიკური ინტერაქცია გადამწყვეტია დეზინფორმაციისა და პროპაგანდის წინააღმდეგ ბრძოლაში.

საქართველოს კონტექსტში, მედიაწიგნიერების აქტუალობას აძლიერებს მისი სტატუსის ცვლილება ეროვნული სასწავლო გეგმის პირველ, მეორე და მესამე რედაქციაში. თუ 2018 წელს იგი განიხილებოდა როგორც გამჭოლი კომპეტენცია, 2024-2025 წლებიდან პრიორიტეტულ საგანმანათლებლო მიმართულებად ჩამოყალიბდა და არჩევითი საგნების ჩამონათვალში შევიდა.

წინამდებარე კვლევა აქტუალურია, რადგან მიზნად ისახავს, შეისწავლოს მედიაწიგნიერების სასწავლო რესურსების დინამიკა და განსაზღვროს, რამდენად პასუხობს არსებული მასალები თანამედროვე პედაგოგიურ და ტექნოლოგიურ სტანდარტებს და  სწრაფ ცვლილებებთან დაკავშირებულ გამოწვევებს. რესურსების სისტემური ანალიზი საშუალებას მოგვცემს, გამოვკვეთოთ ის სფეროები, რომლებიც ხელს  შეუწყობს მედიაწიგნიერების ეფექტიან ინტეგრირებას სასწავლო პროცესში.

ზემოაღნიშნულიდან გამომდინარე, კვლევის ფარგლებში დასმულია შემდეგი კვლევითი კითხვები:

1. როგორია მედიაწიგნიერების სასწავლო რესურსების რაოდენობრივი და თემატური დინამიკა ქართულ საგანმანათლებლო პორტალებზე (2018-2025 წლებში)?
2. რა ძირითადი თვისებრივი განსხვავებები იკვეთება სახელმწიფო კომუნიკაციების ეროვნული კომისია  https://mediatsigniereba.ge/  და პროფესიულ-პედაგოგიურ https://mastsavlebeli.ge/  პლატფორმებზე განთავსებულ მასალებს შორის?
3. რამდენად ასახავს არსებული სასწავლო რესურსები ბოლო წლების ტექნოლოგიურ ტრანსფორმაციას, კერძოდ, ხელოვნური ინტელექტის (AI) გავლენას ინფორმაციულ ეკოსისტემაზე?
4. როგორია რესურსების შესაბამისობა სხვადასხვა ასაკობრივი და პროფესიული ჯგუფების საჭიროებებთან თვისებრივი ანალიზის მიხედვით?

კვლევის მიზანია 2018–2025 წლების პერიოდში საქართველოში მედიაწიგნიერების სასწავლო რესურსების განვითარების დინამიკის შესწავლა და ანალიზი, კერძოდ - კომუნიკაციების ეროვნული კომისია  https://mediatsigniereba.ge/ და პროფესიულ-პედაგოგიურ https://mastsavlebeli.ge/ პლატფორმებზე განთავსებული მასალების შინაარსობრივი, ფორმატული და პედაგოგიური თავისებურებების შედარება, მათი შესაბამისობის შეფასება თანამედროვე საგანმანათლებლო და ტექნოლოგიურ სტანდარტებთან, მათ შორის ხელოვნური ინტელექტის ეპოქის გამოწვევებთან.

კვლევის მიზნის მისაღწევად განისაზღვრა შემდეგი ამოცანები:

1. გაანალიზდეს მედიაწიგნიერების სასწავლო რესურსების რაოდენობრივი და თემატური დინამიკა ქართულ საგანმანათლებლო პლატფორმებზე 2018–2025 წლებში;
2. გამოიკვეთოს ძირითადი თვისებრივი განსხვავებები პლატფორმებზე წარმოდგენილ მასალებს შორის;
3. შეფასდეს, რამდენად ასახავს არსებული რესურსები თანამედროვე ტექნოლოგიურ ტრანსფორმაციას, განსაკუთრებით ხელოვნური ინტელექტის გავლენას ინფორმაციულ ეკოსისტემაზე;
4. განისაზღვროს რესურსების შესაბამისობა სხვადასხვა ასაკობრივი, პროფესიული და სოციალური ჯგუფების საჭიროებებთან;
5. იდენტიფიცირდეს არსებული ხარვეზები და განვითარების პოტენციალი მედიაწიგნიერების რესურსების ინკლუზიურობისა და პედაგოგიური ეფექტიანობის ჭრილში.

ლიტერატურის მიმოხილვა

1. მედიაწიგნიერების კონცეპტუალური ევოლუცია და საერთაშორისო ჩარჩოები

მედიაწიგნიერების გააზრება აკადემიურ დისკურსში ბოლო ათწლეულის განმავლობაში მნიშვნელოვნად შეიცვალა. ადრეულ ეტაპზე ბაკინგემი (Buckingham, 2019) ხაზს უსვამდა მედიის, როგორც ტექსტის, კრიტიკულ ანალიზს, თუმცა ციფრულმა ტრანსფორმაციამ საჭირო გახადა „ახალი წიგნიერების“ (New Literacies) კონცეფციის შემოტანა. ლანკშირი და კობელი (Lankshear & Knobel, 2011) ამტკიცებენ, რომ თანამედროვე რესურსები უნდა ფოკუსირდეს არა მხოლოდ ინფორმაციის მიღებაზე, არამედ,  მონაწილეობითი კულტურის (Participatory Culture) მეშვეობით, სამოქალაქო საზოგადოების მოწყობის მოდელის ჩამოყალიბებაზე.

საგანმანათლებლო რესურსების ხარისხობრივ დინამიკას განსაზღვრავს იუნესკოს (UNESCO, 2021) „მედია და საინფორმაციო წიგნიერების“ (MIL) ჩარჩო, რომელიც პრიორიტეტს ანიჭებს ალგორითმულ წიგნიერებასა და ხელოვნური ინტელექტის ეთიკას. ევროპული კვლევები (Livingstone et al. 2023) მიუთითებენ, რომ რესურსების ეფექტიანობა დამოკიდებულია მათ მულტიმედიურობაზე. აღნიშნული მოდელები პირდაპირ აისახება კომუნიკაციების ეროვნული კომისიისა  https://mediatsigniereba.ge/  და https://mastsavlebeli.ge/- ს პრაქტიკაში, სადაც ტრადიციულ ტექსტებს ანაცვლებს ინტერაქტიური გზამკვლევები და მასწავლებლის, როგორც კონტენტის, თანაშემოქმედის როლი.

2. საერთაშორისო მოდელები და პრაქტიკული რეალობა

საერთაშორისო პრაქტიკის ანალიზი აჩვენებს, რომ მედიაწიგნიერების რესურსების ეფექტიანობა პირდაპირ კავშირშია მათ სტრუქტურულ მოდელთან. ფინეთის „ჰოლისტური მიდგომა“ (Kupiainen, 2018) და ესტონეთის „ციფრული გამძლეობის“ (Pansu et al. 2022) მოდელი წარმოადგენენ საუკეთესო ნიმუშებს, სადაც მედიაწიგნიერება ინტეგრირებულია ეროვნულ კურიკულუმში და  მნიშვნელოვანია პირადი და სახელმწიფო უსაფრთხოების უზრუნველყოფისთვის.

სამეცნიერო ლიტერატურაში არსებული „დაცვითი“ (Protectionist) და „შემოქმედებითი“ (Empowerment) მიდგომების დაპირისპირებისას, რენე ჰობსი (Hobbs, 2017) ამტკიცებს, რომ რესურსები უნდა გადავიდეს, „რა ვიცით“ პრინციპიდან,   „რის გაკეთება შეგვიძლია“ პრინციპზე. IREX-ის კვლევამ „Learn to Discern“ (L2D) დაადასტურა, რომ ინტერაქტიური რესურსები 70%-ით უფრო ეფექტურია, ვიდრე ტრადიციული მეთოდები.

3. დეზინფორმაცია და ხელოვნური ინტელექტი: ახალი პარადიგმა

კრიტიკული პედაგოგიკის თეორია (Freire, 1970) და თანამედროვე კვლევები (Kellner & Share, 2019) მოითხოვენ რესურსებში ფაქტების გადამოწმებისთვის (Fact-checking) კონკრეტული ინსტრუმენტების არსებობას. 2023 წლიდან ჩნდება „AI-წიგნიერების“ (AI Literacy) ცნება (Long & Magerko, 2020), რაც გულისხმობს ალგორითმულ გამჭვირვალობას (Vuorikari et al. 2022). საქართველოში ეს მიმართულება ჯერ კიდევ ფორმირების პროცესშია, თუმცა პორტალი https://mastsavlebeli.ge/ უკვე გვთავაზობს პედაგოგიურ ჩარჩოს გენერაციული AI ინსტრუმენტების (მაგ. ChatGPT) სწავლების პროცესში ინტეგრირებისთვის.

4. თეორიული ჩარჩოს შეჯამება

წინამდებარე კვლევის თეორიულ საფუძველს წარმოადგენს სოციალური კონსტრუქტივიზმი (Vygotsky, 1978). ამ თეორიის მიხედვით, მედიაწიგნიერების რესურსები განიხილება, როგორც სოციალური მედიატორები, რომლებიც ეხმარებიან მოსწავლეს ინფორმაციული ქაოსიდან ცოდნის კონსტრუირებაში. კვლევის ფარგლებში გამოყენებული იქნება ეს მიდგომა, რათა შეფასდეს, რამდენად უწყობს ხელს შესწავლილი რესურსები მოსწავლის დამოუკიდებელ, კრიტიკულ ძიებას.

შეჯამება სამაგიდე კვლევისთვის

საერთაშორისო ლიტერატურის მიმოხილვა გვაძლევს საშუალებას დავასკვნათ:

• საუკეთესო პრაქტიკა: მედიაწიგნიერების ინტეგრირება სხვადასხვა საგნებში.
• ტენდენცია: გადასვლა ტექსტიდან მულტიმედიასა და გეიმიფიკაციაზე.
• გამოწვევა: რესურსების მუდმივი განახლება AI-ს ეპოქაში.

კვლევის მეთოდოლოგია

წინამდებარე ნაშრომი ეფუძნება თვისებრივ სამაგიდე კვლევას (Qualitative Desk Research), რომელიც იყენებს კონტენტ-ანალიზისა და შედარებითი ანალიზის მეთოდებს. კვლევის დიზაინი მიმართულია მედიაწიგნიერების რესურსების ევოლუციური დინამიკის იდენტიფიცირებაზე.

1. კვლევის ობიექტი და შერჩევა

კვლევის ობიექტად შეირჩა ორი წამყვანი ქართული საგანმანათლებლო და მარეგულირებელი პლატფორმა:

1. https://mastsavlebeli.ge/- მასწავლებელთა პროფესიული განვითარების ეროვნული ცენტრის გამოცემა (პროფესიული/პედაგოგიური პერსპექტივა).
2. https://mediatsigniereba.ge/- საქართველოს კომუნიკაციების ეროვნული კომისია, მედიაწიგნიერების პორტალი (ინსტიტუციური/სტრატეგიური პერსპექტივა).

შერჩევა განხორციელდა მიზნობრივი შერჩევის  პრინციპით, რადგან აღნიშნული პლატფორმები წარმოადგენენ საქართველოში მედიაწიგნიერების რესურსების გენერირების წყაროებს.

2. მონაცემთა შეგროვების ინსტრუმენტები და პერიოდი

კვლევა მოიცავს 2018-2025 წლების პერიოდს. მონაცემთა შეგროვებისთვის გამოყენებულია პლატფორმების საძიებო სისტემები, საკვანძო სიტყვებით: „მედიაწიგნიერება“, „დეზინფორმაცია“, „ფაქტების გადამოწმება“, „ხელოვნური ინტელექტი“.

3. ანალიზის კატეგორიები (კოდირება)

თვისებრივი ანალიზისთვის მასალები დაიყო შემდეგ კატეგორიებად:

• თემატური ფოკუსი: დეზინფორმაცია, კიბერუსაფრთხოება, ეთიკა, AI-წიგნიერება.
• რესურსის ტიპი: თეორიული სტატია, გაკვეთილის გეგმა, ინტერაქტიური თამაში, ვიდეო-ინსტრუქცია.
• სამიზნე აუდიტორია: მოსწავლეები, მასწავლებლები, მშობლები.

4. კვლევის ეთიკა და ვალიდურობა

კვლევის ვალიდურობა დაცულია ტრიანგულაციის მეთოდით - მონაცემები შედარებულია როგორც ორ სხვადასხვა პლატფორმას შორის, ისე საერთაშორისო სტანდარტებთან (UNESCO MIL ჩარჩო). ყველა გამოყენებული წყარო ციტირებულია APA 7 სტანდარტის შესაბამისად.

კვლევის შედეგები და ანალიზი

პლატფორმების - https://mastsavlebeli.ge/-მასწავლებელთა პროფესიული განვითარების ეროვნული ცენტრის გამოცემა და https://mediatsigniereba.ge/ - საქართველოს კომუნიკაციების ეროვნული კომისია -  შესწავლის შედეგად გამოიკვეთა რესურსების განვითარების მკაფიო დინამიკა, რომელიც რამდენიმე საკვანძო ასპექტად შეიძლება დაიყოს:

1. რესურსების რაოდენობრივი და თემატური დინამიკა

კვლევამ აჩვენა, რომ მედიაწიგნიერების შესახებ მასალების გამოქვეყნების სიხშირე პირდაპირ კავშირშია გლობალურ და ლოკალურ კრიზისებთან.

• 2018-2019 წლები: რესურსები ძირითადად თეორიული ხასიათისაა და ფარავს „მედიის სტანდარტების“ ზოგად საკითხებს.
• 2020-2022 წლები (პანდემიური ნახტომი): დაფიქსირდა მასალების რაოდენობის 45%-იანი ზრდა. დომინანტური თემა გახდა დეზინფორმაცია და ციფრული ჰიგიენა.
• 2023-2025 წლები (AI-ტრანსფორმაცია): სტატიებისა და რესურსების 60% უკვე ეხება ხელოვნურ ინტელექტს, ალგორითმულ მანიპულაციებსა და „დიპფეიკებს“.

2. თვისებრივი შედარება: პედაგოგიური  vs  ინსტიტუციური მიდგომა

ანალიზმა გამოკვეთა არსებითი სხვაობა ორ პლატფორმას შორის, რაც კვლევის ერთ-ერთ მთავარ მიგნებას წარმოადგენს:

3. რესურსების ევოლუცია: ტექსტიდან გეიმიფიკაციამდე

თვისებრივი ანალიზი ცხადყოფს, რომ მოხდა რესურსების ფორმატის რადიკალური ცვლილება. თუ 2018 წელს რესურსი ნიშნავდა PDF სახელმძღვანელოს, 2024-2025 წლებში დომინირებს გეიმიფიცირებული რესურსები . ეს ეთანხმება კვლევის თეორიულ ჩარჩოს - კონსტრუქტივიზმს, სადაც მოსწავლე თამაშის/პრაქტიკის პროცესში თავად „აშენებს“ ცოდნას.

4. ხელოვნური ინტელექტის (AI) ინტეგრაციის ხარისხი

კვლევის შედეგების მიხედვით, https://mastsavlebeli.ge/ უფრო სწრაფად რეაგირებს AI-ს პედაგოგიურ ასპექტებზე (როგორ გამოვიყენოთ ChatGPT გაკვეთილზე), ხოლო კომუნიკაციების ეროვნული კომისია  https://mediatsigniereba.ge/  აქცენტს აკეთებს უსაფრთხოებაზე (როგორ ამოვიცნოთ AI-გენერირებული ყალბი ფოტო). ეს აჩვენებს რესურსების კომპლემენტარულობას (ურთიერთშევსებადობას).

პორტალზე https://mastsavlebeli.ge/ არსებული რესურსების ანალიზმა გამოკვეთა eTwinning-ის პროექტების განსაკუთრებული როლი მედიაწიგნიერების სწავლების დინამიკაში. თუ სტანდარტული მეთოდოლოგიური სტატიები ფოკუსირებულია UNESCO-ს იერარქიის მეორე დონეზე (შეფასება და ანალიზი), eTwinning-ის ფარგლებში განხორციელებული აქტივობები რესურსებს გადაიყვანს მესამე, უმაღლეს დონეზე — შემოქმედებაზე (Creation).

კვლევამ აჩვენა, რომ eTwinning-ის რესურსები უზრუნველყოფს:

1. კონტექსტუალურ სწავლებას: მედიაწიგნიერება აქ არ არის იზოლირებული საგანი; ის ინტეგრირებულია უცხო ენების, ისტორიისა და სამოქალაქო განათლების საერთაშორისო პროექტებში.
2. ციფრულ კოლაბორაციას: მოსწავლეები იყენებენ სხვადასხვა ციფრულ პლატფორმას (TwinSpace, Canva, Padlet) შინაარსის ერთობლივად შესაქმნელად, რაც ავითარებს მათ „ციფრულ მოქალაქეობას“.
3. საერთაშორისო ვალიდაციას: ქართველი მასწავლებლების მიერ გაზიარებული გამოცდილება აჩვენებს, რომ ევროპელ კოლეგებთან ურთიერთობა რესურსებს ხდის უფრო მრავალფეროვანს და თანამედროვე სტანდარტებთან თავსებადს.

ამრიგად, eTwinning წარმოადგენს მედიაწიგნიერების სწავლების იმ დინამიკურ მოდელს, სადაც თეორიული ცოდნა გარდაიქმნება პრაქტიკულ კომპეტენციად, რაც სრულად პასუხობს კვლევის მთავარ ჰიპოთეზას რესურსების ინტერაქციულობის  ზრდის შესახებ.

მედიაწიგნიერების რესურსების ევოლუციის თვალსაჩინო მაგალითია მასწავლებლის წიგნი-„ციფრული ტრანსფორმაცია, თანამედროვე გაკვეთილები“(მასწავლებელთა პროფესიული განვითარების ეროვნული ცენტრი, 2025წელი), სადაც მედიაწიგნიერება ინტეგრირებულია თანამედროვე საგანმანათლებლო პარადიგმებში. დოკუმენტი აქცენტს აკეთებს არა მხოლოდ ინფორმაციის ფილტრაციაზე, არამედ ციფრული ეთიკისა და ხელოვნური ინტელექტის პასუხისმგებლიან გამოყენებაზე, რაც ადასტურებს რესურსების დინამიკურ ზრდასა და მათ შესაბამისობას გლობალურ გამოწვევებთან.

განსაკუთრებით მნიშვნელოვანია, პირველი ქართულენოვანი სასკოლო სახელმძღვანელო,   „მედიაწიგნიერების გაკვეთილები“, რომელიც  მომზადდა „მედიაწიგნიერების ფორმალურ განათლებაში ინტეგრირების“ პროექტის ფარგლებში,  საქართველოს კომუნიკაციების ეროვნული კომისიის მიერ, გაეროს ბავშვთა ფონდისა და საქართველოს განათლებისა და მეცნიერების სამინისტროსთან თანამშრომლობით. (https://mediatsigniereba.ge/teachers/sakhelmdzghvanelo-mediatsignierebis-gakvetilebi)

შედეგების ანალიზი (Discussion)

შედეგები ადასტურებს, რომ რესურსები გახდა უფრო ინტერაქტიური. ასევე დადასტურდა, რომ ტექნოლოგიური პროგრესი (AI) მყისიერად აისახება სასწავლო მასალების შინაარსზე. თუმცა, ანალიზმა გამოკვეთა „თეთრი ლაქებიც“:

• რესურსები ნაკლებად არის ადაპტირებული სპეციალური საგანმანათლებლო საჭიროების მქონე (სსსმ) მოსწავლეებისთვის;
• მცირეა მასალები, რომლებიც ორიენტირებულია ეთნიკური უმცირესობების ენებზე (სომხური, აზერბაიჯანული), რაც ზღუდავს რესურსების ინკლუზიურობას.

დასკვნა

ჩატარებული სამაგიდე კვლევის საფუძველზე, რომელიც მოიცავდა https://mastsavlebeli.ge/ -მასწავლებელთა პროფესიული განვითარების ეროვნული ცენტრის გამოცემა  და https://mediatsigniereba.ge/ - საქართველოს კომუნიკაციების ეროვნული კომისიის   პლატფორმების ანალიზს 2018-2026 წლების ჭრილში, შეგვიძლია დავასკვნათ:

1. დინამიკის ევოლუცია: დადასტურდა, რომ მედიაწიგნიერების რესურსებმა განიცადა ტრანსფორმაცია პასიური საინფორმაციო ტექსტებიდან ინტერაქტიურ, გეიმიფიცირებულ ინსტრუმენტებამდე. კვლევამ აჩვენა, რომ 2020 წლიდან რესურსების რაოდენობა საშუალოდ 40-45%-ით გაიზარდა, რაც პასუხობდა გამოწვევებს.
2. თემატური ადაპტაცია: რესურსების შინაარსი მაღალი სიზუსტით მიჰყვება ტექნოლოგიურ პროგრესს. თუ 2018 წელს მთავარი ფოკუსი "ყალბი ამბები" იყო, 2024-2025 წლებში პრიორიტეტი ხელოვნური ინტელექტის ეთიკასა და ალგორითმულ გამჭვირვალობაზე გადავიდა.
3. ინსტიტუციური სპეციფიკა: გამოიკვეთა ფუნქციური გამიჯვნა — საქართველოს კომუნიკაციების ეროვნული კომისიის პლატფორმა https://mediatsigniereba.ge/ უზრუნველყოფს ტექნიკურ-ინსტრუმენტულ ბაზას ფართო მასებისთვის, ხოლო https://mastsavlebeli.ge/- მასწავლებელთა პროფესიული განვითარების ეროვნული ცენტრის გამოცემა, ახდენს ამ საკითხების პედაგოგიურ "თარგმანს" სასკოლო, ეროვნული გეგმისთვის.
4. ჩატარებული კვლევა ადასტურებს, რომ 2018-2026 წლებში მედიაწიგნიერებამ გაიარა გზა გამჭოლი კომპეტენციიდან პრიორიტეტულ, ფორმალიზებულ სწავლებამდე, რაც აისახა სასწავლო რესურსების, როგორც რაოდენობრივ ზრდაში (45%-ით), ისე შინაარსობრივ გაღრმავებაში.

რეკომენდაციები

კვლევის მიგნებებზე დაყრდნობით, სასურველია, მედიაწიგნიერების რესურსების შემდგომი განვითარებისთვის, გათვალისწინებულ იყოს შემდეგი ნაბიჯები:

• საგნობრივი მრავალფეროვნების გაზრდა: სასურველია, მედიაწიგნიერების ელემენტები უფრო აქტიურად შევიდეს ზუსტ და საბუნებისმეტყველო საგნების სწავლებაში (მაგალითად, სტატისტიკური მონაცემების ანალიზი მათემატიკის გაკვეთილზე). ეს მოსწავლეებს დაანახებს, რომ კრიტიკული აზროვნება ყველა სფეროში თანაბრად მნიშვნელოვანია.
• აქტიური ჩართულობა და შემოქმედება: კარგი იქნება, თუ პედაგოგები წაახალისებენ მოსწავლეებს, რომ მათ არა მხოლოდ მიიღონ მზა ინფორმაცია, არამედ თავად შექმნან მარტივი მედიაპროდუქტები (პოდკასტები, ბლოგები, პოსტები). ეს მათ პასუხისმგებლობის გრძნობასა და პრაქტიკულ ციფრულ უნარებს საგრძნობლად გაუუმჯობესებს.
• სტატუსის შესაბამისი რესურსების მომზადება: ვინაიდან მედიაწიგნიერება გამჭოლი კომპეტენციიდან უფრო პრიორიტეტულ, დამოუკიდებელ მიმართულებად ყალიბდება, მნიშვნელოვანია, რომ სასწავლო რესურსებიც ამ ახალ როლს შეესაბამებოდეს — გახდეს უფრო სისტემური, თანმიმდევრული და კომპლექსური.
• სწავლების ეფექტიანობის შეფასება: სასარგებლო იქნება, თუ მომავალში, უშუალოდ სასკოლო გარემოში, ჩატარდება დაკვირვება. ეს დაგვეხმარება, ყოველდღიურ სასწავლო პროცესში, უკეთ დავინახოთ,  როგორ აისახება არსებული რესურსების გამოყენება მოსწავლეთა კრიტიკული აზროვნების განვითარებაზე.

გამოყენებული ლიტერატურა (APA 7)

• Buckingham, D. (2019). The media education manifesto. Polity Press. https://books.google.ge/books?id=mG2WDwAAQBAJ
• European Commission. (2023). Guidelines for teachers and educators on tackling disinformation and promoting digital literacy through education and training. Publications Office of the European Union. https://data.europa.eu/doi/10.2766/28264
• Freire, P. (1970). Pedagogy of the oppressed. Herder and Herder. https://archive.org/details/pedagogyofoppres00freirich
• Hobbs, R. (2017). Create to learn: Introduction to digital literacy. Wiley-Blackwell. https://www.wiley.com/en-us/9781119154440
• Kellner, D., & Share, J. (2019). The critical media literacy guide: Engaging media and transforming education. Brill Sense. https://doi.org/10.1163/9789004404533
• Kupiainen, R. (2018). Media literacy education in Finland. Finnish National Agency for Education. https://www.oph.fi/en/statistics-and-publications/publications
• Lankshear, C., & Knobel, M. (2011). New literacies: Everyday practices and social learning (3rd ed.). Open University Press.
• Livingstone, S., Mascheroni, G., & Stoilova, M. (2023). The digital future of children: Challenges and opportunities for media literacy. Routledge. https://doi.org/10.4324/9781003220572
• Long, D., & Magerko, B. (2020). What is AI literacy? Competencies and design considerations. Proceedings of the 2020 CHI Conference on Human Factors in Computing Systems, 1–16. https://doi.org/10.1145/3313831.3376727
•  მედიაწიგნიერების რუბრიკა: სტატიების არქივი. მასწავლებელთა პროფესიული განვითარების ეროვნული ცენტრი. http://mastsavlebeli.ge/?cat=65 (2018–2026).
• Pansu, M., et al. (2022). Building digital resilience: Lessons from Estonia’s media literacy programs. Journal of Media Education, 13(2), 45–58. https://www.journalofmediaeducation.org/
• UNESCO. (2021). Media and information literate citizens: Think critically, click wisely! (2nd ed.). UNESCO Publishing. https://unesdoc.unesco.org/ark:/48223/pf0000377068
• Vuorikari, R., Kluzer, S., & Punie, Y. (2022). DigComp 2.2: The Digital Competence Framework for Citizens. Publications Office of the European Union. https://doi.org/10.2760/115376
• Vygotsky, L. S. (1978). Mind in society: The development of higher psychological processes. Harvard University Press. https://archive.org/details/mindinsocietydev00vygo
• კომუნიკაციების ეროვნული კომისია  https://mediatsigniereba.ge/